Бой партызанскай брыгады імя В.М.Молатава супраць нямецка-фашысцкіх захопнікаў у г.п. Любяшоў Валынскай вобласці 21 ліпеня 1943 г.

    Баявая задача партызан — не даць гітлераўцам вывезці нарабаваныя ў мясцовых жыхароў сельгаспрадукты, разграміць гарнізон, папоўніць запасы брыгады боепрыпасамі і зброяй. Кіраваў боем камбрыг М.І.Герасімаў. Выставіўшы засады вакол Любяшова, атрады імя С.Г.Лазо і М.Ц.Шыша скрытна выйшлі на рубяжы атакі, разведчыкі знялі вартавых, штурмавыя групы блакіравалі фашыстаў у бункерах. Партызаны нагрузілі 300 падвод, а маёмасць і прадукты, якія засталіся ў 8 складах, падпалілі. Галоўныя сілы брыгады пад прыкрыццём ар'ергарда (узвода партызан, які прыняў на сябе ўдар прыбыўшага падмацавання гітлераўцаў і не прапусціў праследавацеляў) адышлі на свае базы. У баі партызаны знішчылі каля 25 фашыстаў. Страцілі забітымі некалькі сваіх таварышаў.